سلسلة سطور برمجية للسوفتجية { 2 }

إزيكوا يا شباب ...

 كنا بدأنا مجموعة بوستات بنتكلم فيها عن عالم البرمجة المبهم عند أغلب السوفتجية 

وكنا بنتبادل فية الاراء والافكار والمقترحات عن لغات البرمجة المهمة 
اللى من خلالها تقدر تطور تطبيق او برنامج خاص بيك زى البرامج والادوات الاحترافية المدفوعة
 وزى برامج البوكسات .. وكنا إتكلمنا فى البوست الاول عن البدايات ونبذة بسيطة عن البرمجة

 وإزاى تقدر تعمل سكريبت بسيط فية بعض الاوامر الخاصة

 باوضاع ADB واوضاع الفاست بوت لاجهزة الاندرويد المختلفة

واللى مشافش البوست الاول يقدر يشوفة من الموضوع التالى على موقع ملوك تيم

-  سلسلة سطور برمجية { 1 }

وزى ما قولنا إحنا بنتبادل الافكار والمعلومات وبنديك اول الخيط واول الطريق اللى تقدر تبدأ منة 
لو فعلا عندك شغف وحب إستطلاع ونفسك تعمل حاجة وتدخل مجال البرمجة 
لكن مش لاقى حد يفيدك او بداية الطريق لاننا عارفين ان العالم دة يكاد يكون محاط بالسرية والكتمان عند اغلب الناس ... 
لكننا  بنحب دايمأ نكون فى ظهر كل فنى طموح

 وعايز يتقدم فى شغلة ويطور من نفسة 

وفى البوست دة هنتكلم عن أهم لغات البرمجة اللى ممكن تبدأ بيها او تتعلمها علشان تقدر تطور الاداة الخاصة بيك .

وفى اكتر من لغة برمجة تقدر تتعلمها وتبدأ فى دراستها 
وطبعا إحنا مش هنتكلم بالتفصيل عن كل لغة لان كل لغة فيهم هتحتاج بوستات وبوستات علشان تقدر تتكلم عنها
 لكن زى ما قولنا إحنا بنديلك اول الطريق واهم اللغات وبعدها تقدر تعتمد على نفسك 
وتبحث عن كل لغة فيهم وتشوف اية اللى يناسبك فيهم وتبدأ تتعلمها ... ومن اهم اللغات دى :

1 - لغة برمجة : Java

ولغة جافا من اهم اللغات اللى ممكن تتعلمها والاكتر طلبأ فى سوق العمل وهى اللغة الام لنظام اندرويد ومن خلالها تقدر تطور برامج متنوعة سواء برامج سطح المكتب او التعامل مع قواعد البيانات او تطوير الويب من خلال جافا سكريبت وطبعأ مش هنقدر نتكلم عنها فى سطر او سطرين 

2 - لغات فيجوال ستديو زى : VB.NET و C# المدعومين من مايكروسوفت

وطبعا لغات فيجوال ستديو قوية ومطلوبة فى سوق العمل خصوصأ فى الشركات الكبيرة

وفى أكتر من أداة تم تطويرهم من خلال بيئة فيجوال ستديو زى

- أداة Hell Team 

ودى فيها بعض الاوامر والعمليات الخاصة بالاندرويد وبعض العمليات فى اوضاع " ADB " و " Fastboot " 
واكيد فى ناس عارفاها وحملتها وا لاداة دى تم تطويرها من خلال لغة سى شارب وداخل بيئة فيجوال ستديو

- وكمان برنامج Tenorshare 4uKey ودة برنامج خاص بالتعامل مع أجهزة أبل
 وتم تطويرة من خلال بيئة فيجوال ستديو أيضأ 

لكن علشان تطور اداة او برنامج باى لغة من لغات فيجوال ستديو لازم تكون دارسها كويس 
علشان تقدر تحميها من الاختراق والثغرات والتكريك فى اغلب الوقت

3 - لغة QT 

ودى بيئة عمل بتقدر من خلالها تطور برامج وتطبيقات مختلفة وتربطها بقطع الهاردوير الداخلية للجهاز وبتتعامل كويس مع منافذ ال USB وفيها اضافات ومميزات جميلة وبتقدر تطور من خلال QT Creator

وفى منها نسخة مفتوحة المصدر ومنها نسخة مدفوعة وطبعأ النسخة المدفوعة بتكون اقوى واشمل 

ومتاح فيها كل المميزات اللى ممكن متكونش موجودة فى النسخة المجانية

واغلب الادوات والبرامج الجديدة بقت بتعتمد على QT زى EFT Dongle

واداة QTool المدفوعة الخاصة بالتعريب

لانها بتوفر امكانيات ومميزات قوية ومكتبات مختلفة للتعامل مع أنظمة الاندرويد

4 - لغه " Delphi "

 ودى من اللغات القوية اللى تم برمجة بعض الادوات والبرامج الخاصة بالبوكسات من خلالها
 زى " Octopus Box " و اداة " Uni-Android "

5 - لغة " C++ " 

ودى من اقوى اللغات واقدمها ولو اتقنتها تقدر تعمل بيها تطبيقات إحترافية ومميزة ...
 لكن تعتبر من اصعب اللغات وخصوصأ بالنسبة للمبتدئين.

- وفى لغات تانية قوية زى لغة بايثون مثلا واللى بدأت فى الانتشار الواسع فى السنين اللى فاتت
 ودة بيرجع لسهولتها عن باقى اللغات

- طيب إحنا قولنا نبذة بسيطة عن أهم اللغات اللى تقدر تبدأ بيها وتتعلمها ومن خلالها تقدر تدخل عالم البرمجة
 وتطور ادواتك الخاصة

- وطبعا عارف ان فى ناس كتير دماغها لفت وبرضو مش عارفة تبدأ منين .🤔

طيب هنحاول نبسط الامور أكتر .. لو بدأت مثلا فى تعلم لغة برمجة منهم وليكن جافا مثلا او سى شارب واتقنتها 
... هيكون سهل عليك جدأ إنك تتعلم لغة تانية بكل سهولة

لانك لو إتعلمت الاساسيات كويس جدأ زى الكلاسات والاوبجيكت والوراثة والجمل الشرطية وجمل التكرار وانواع البيانات والداتا تايب ...  وطريقة كتابة الدوال والباراميترز . بعد كدة هيكون الامر سهل عليك إنك تتعلم اى لغة 
والفرق هيكون فى إختلاف المكتبات الخاصة بكل بيئة تطوير 

لكن الاساسيات واحدة لكل اللغات تقريبأ او اغلبها لانها بتعتمد على برمجة الكائنات او ما يسمى ب " OOP " .

- وفى النهاية ياريت نكون قدرنا نبسط بعض المفاهيم شوية وتكونوا إستفدتوا من النقط السريعة دى
 وتقدروا تبدأوا فى مجال البرمجة بدون خوف 
والموضوع إجتهاد شخصى ولو أخطأت فى اى معلومة يا ريت بلغونى فى التعليقات

بس نصيحتى للناس اللى عايزة تتعلم برمجة .. 
لازم تكون بتحبها وعايز تعمل حاجة بيها لانها محتاجة صبر فى التعلم علشان تقدر تبنى أساس سليم ..

والاهم ثم الاهم ثم الاهم .. إنك تختار لغة واحدة وتبدأ تتعلمها كويس قوى وتبعد عن التشتت لان هييجى عليك وقت من الا وقات بتكون عايز تتعلم وتجرب كل اللغات ولو دخلت فى الدايرة دى مش هتخرج منها ابدأ ومش هتتعلم حاجة

لازم تتأسس كويس قوى فى اى لغة فيهم وتعمل بيها اى بروجيكت خاص بيك ولما تتعلمها كويس
 تقدر تتعلم لغة تانية وهتلاقى الموضوع سهل جدأ جدأ لان وقتها هيكون معاك أساس قوى وسليم

- وطبعا بنفكركم إننا بنديلكوا اول الخيط واول الطريق اللى تقدر تبدأ منة وبنتبادل معاكم الافكار والمقترحات ومنتظرين الفترة الجاية نشوف مطورين عرب كتير وإن شاء الله اغلبهم هيكون متخرج من #ملوك_السوفت 
ووقتها هنكون فخورين بكل شخص إتخرج من عندنا وقدر يكون مطور قوى قادر ينافس بقوة ...
 وطبعأ الموضوع محتاج صبر ثم صبر ثم صبر ثم صبر .. 
علشان تقدر تتعلم على اساس صحيح وأكيد هيجيلك اوقات هتكون مشتت فيها وممكن محبط كمان 
لكن لو قدرت تتخطى الاوقات دى وقتها مفيش حاجة هتقدر توقفك .

ومعلش طولت عليكم كالعادة لكن كان لازم نعمل كدة عشان نقدر نوصل الافكار بشكل سهل للجميع

وممكن نبقا نعمل بوست كمان نوضح فية اهم المصادر اللى تقدر تتعلم منها 
سواء مواقع او منتديات او قنوات على اليوتيوب

تعديل المقال